Uluk nanain hato’o hau nia agradese ba Aman Maromak tamba ho Nia kbiit atan hau bele hato’o hela liafuan balu relasiona ho plataforma website nebe oferese husi SECOMS. Hau nia agradese no apresiasaun bemvindo mos ba Chefi Departemento ICT husi SECOMS ho nia ekipa ne'ebe disponivel to’o mai iha ami nia eskola hodi apoiu no kria ona plataforma website ida ne’e. ami senti kontente tamba ami nia eskola hetan oportunidade hodi hetan apoiu direta husi media SECOMS. Ami hein katak estudante sira sei aproveita ho didiak hodi aprende no esplora konesimentu no kreatividade hodi dezenvolve sira nia komitmentu liu husi plataforma website ida ne’e.

Plataforma website ida ne’e nudar pasu importante ida estudante sira atu kadi kakutak no kreativu para kanaliza informasaun liu husi dezenvolve sira nia hanoin tuir ida-idak nia talenta no bele simu ho fasil informasaun ho lalais.  Plataforma website ida ne’e mos importante no fundamental tebes tamba bele sai hanesan fontes principal ba estudantes sira, inan-aman sira no ba publiku tomak, atu akompanha informasaun nebe adequadu ligadu ho progresu estudu no prosesu aprendisajem estudante sira nian iha eskola ESGPC DMCL-Maliana.

Website ida ne’e mos iha funsaun importante oinsa atu transmiti informasaun ho kredibel liga ba atividade eskola nian inklui atividade extrakurikuler nebe trasa ona liu husi atividade trimestral no annual.

Juvenal dos Reis Ferreira, L.Ed